Սամվել Մարտիրոսյան |ԿԵՆԴԱՆԱԿԵՐՊԵՐ Ու ՀՐԱՇԱԿԵՐՊԵՐ, Ու — ֆե

Ու – ԱՆՊԱՏԱՍԽԱՆ ԳԱՅԼԵՐ

Քեզ չեմ տեսել ես բնավ,

Բայց այսպես եմ ես կարծում՝

Քո ձայնն է ինձ հալածում:

Կթողնես ու կգնաս,

Բայց քո սիրած տեղերում,

Արյունը միշտ կմնա:

Քեզ չեմ կանչել ես բնավ,

Բայց այսպես եմ ես կարծում՝

Քեզնից, չունեմ ես պրծում:

ՓՅՈւՐ – ՏԱՐԱՇԽԱՐՀԻԿ

Դու  իմ  սրտից  ելար  դուրս ,

Փ Յ ՈւՐ  —  քեզ  աստղերը  տարան ,

Անօթևան ,  անվրան ,

Դու  իմ  սրտից  ելար  դուրս :

Թևերդ  թափ  տվեցիր ,

Ու  երկնքից  էլ  թռար ,

Փ Յ Ու Ր  —  ու՞մ  թևերը  առար ,

Ու  երկնքից  ելար  դուրս :

Հիմա  իջել  ես  մի  պահ ,

Իմ  երկնքին ,  իմ  սրտին ,

Բայց  ապրում  ես  որպես  հյուր ,

Փ Յ ՈւՐ  —  մինչև  լույս ,  մինչև  լույս …

ՔԵ — ՇՈՂԱԿԱԹ

Ք Ե  —  ն   չքնաղ  է ,  քելե ,  քելե ,

Երգ  ու  խաղ  է ,  քելե ,  քելե :

Քերծեց ,  անցավ ,

Կրակ  ու  ցավ ,

Քեզ  է  գալիս  ու  քոնը  չի ,

Շունչը պահի ու չշնչի …

Ք Ե  —  ն   չքնաղ  է ,

Ք Ե  —  ն ՝  գեղանի,

Ք Ե  —  ն    քեզ  կառնի  ու  կտանի :

Եվ – ԱՆԿՐԿՆԵԼԻՆԵՐԸ 

Չեմ նեղանա ես Եվ-ից,

Թե ինձ նայի վերևից,

Թե ներքևից ինձ նայի,

Չեմ նեղանա ես Եվ-ից:

Իմ կեսն է նա, ձեզ ասեմ,

Բայց ուրիշ կես է փնտրում,

Ուրիշներին է ընտրում,

Ու դա ինձ չի խանգարի:

Չեմ փոխելու ես Եվ-ին,

Եվ-ին ես միշտ կսպասեմ,

Ու, ասեմ ձեզ՝ դա նրա,

Ու իմ կյանքն է երևի:

Օ – ԵՐԱՆԵԼԻ 

Օ-ն շատերին կփրկի,

Ու շատերին կսուզի,

Ու կմնա այդպիսին,

Եթե թողնեք իմ հույսին:

Բայց սուզվողները, անշուշտ,

Մեզ չեն սիրի, կանիծեն,

Նոր օղակներ կգծեն,

Ջրից կուշտ են նրանք, կուշտ:

Փրկվածներն էլ, արի տես,

Իրենց օղակն են գտել,

Ու վզներին փաթաթել,

Նրա՛նք էլ մեզ կդատեն:

Իսկ օ-ն նորից կփրկի,

Իսկ օ-ն նորից կսուզի,

Ու կմնա այդպիսին,

Եթե թողնեք իմ հույսին:

ՖԵ – ԱՆԱՎԱՐՏ 

Խորհուրդներ ունի իր մեջ ՖԵ-ն,

Ու խորհուրդն այսպիսին է նրա՝

-Ցավերը դեռ պիտի ցավեն,

Եվ ծիծաղը դեռ պիտի ծիծաղի

Լացի ու ծիծաղի վրա:

Գաղտնիքներ ունի իր մեջ ՖԵ-ն,

Եվ գաղտնիքն այսպիսին է նրա՝

-Ես այլևս չունեմ անելիք,

Բայց դեռ նոր գաղտնիքներ կծնվեն,

Որոնք չեն տարբերվի հներից:

Երազներ ունի իր մեջ ՖԵ-ն,

Ու երազանքն այսպիսին է նրա՝

Որ սկիզբն ու վերջը չչափվեն,

Չդրվեն նժարի վրա: